Ffoniwch i archebu
Call us now to book
07904 265604

Rhif Elusen 507153

Charity Number 507153

Polisi Preifatrwydd / Privacy Policy

Dilynwch ni
Follow us
  • Twitter - White Circle
  • White Facebook Icon
  • White Instagram Icon

© 2016 Ymddiriedolaeth Ynys Enlli

 

© 2016 Bardsey Island Trust

 

Gyda diolch i Ben Porter a BESIDE am yr hawl i ddefnyddio ei luniau.

Llun tudalen flaen gan Myles Jenks

With thanks to Ben Porter Wildlife Photography  and BESIDE for kind use of images.

 

Home page image by Myles Jenks 

Gwybodaeth Hanfodol

Cewch wybodaeth yma am bopeth sy'n ymwneud â'ch arhosiad ar Enlli. Rydym yn edrych ymlaen at eich croesawu i'r ynys. 

Mae’r wythnos rentu o ddydd Sadwrn i ddydd Sadwrn, Ebrill - Hydref.

 

Gellir cymryd gwyliau byr am 3 noson neu 4 noson, wrth gyrraedd ddydd Sadwrn, neu gyrraedd canol wythnos a gadael ar ddydd Sadwrn. Cysylltwch â ni am brisiau.

Mae angen blaendal o 50% i gadarnhau eich archeb.

Rhaid talu'r gweddill 90 diwrnod cyn dechrau eich gwyliau.

Gellir archebu trwy gysylltu â Swyddfa Ymddiriedolaeth Ynys Enlli ar 07904 265604 neu drwy'r e-bost post@enlli.org

Croesi i Enlli

Mae cost y cwch yn ychwanegol i brisiau’r tai ac mae'r gwasanaeth cwch o Borth Meudwy yng ngofal cwmni Mordaith Llŷn.

www.bardseyboattrips.com.

 

£40 yw'r gost yn 2019. Fe'ch cynghorir i wisgo dillad glaw ar gyfer y croesi. Os bydd y tywydd yn caniatáu, mae ymwelwyr am yr wythnos yn croesi ar ddyddiau Sadwrn o Borth Meudwy (ger Aberdaron). Os bydd y croesi’n cael ei ohirio oherwydd y tywydd, byddwch yn croesi ar y diwrnod braf cyntaf canlynol.


Mae'r broses o gludo teithwyr a bagiau i ac o'r ynys yn eithaf cymhleth ac yn galw am amynedd a dealltwriaeth.

A fyddech gystal â gwirio’r trefniadau cwch cyn eich ymweliad drwy ffonio 
07971 769895 ar y noson cyn croesi. Wrth wneud hyn, cewch fanylion eich amser chi i groesi. Ffoniwch ar ôl 6.00 yr hwyr os gwelwch yn dda.

Byddwch yn cael gwybod pryd i gyrraedd Cwrt a Phorth Meudwy a dylech gadarnhau'r nifer o bobl sydd yn eich grŵp neu deulu.

Parcio

 

Gellir parcio ceir ar risg y perchennog yn fferm Cwrt am ffi o £15 yr wythnos. Mae'r tâl yn daladwy i'r ffermwr, G Roberts pan fyddwch yn cyrraedd.
Bydd aelod o deulu’r fferm yn eich cyfarfod ym maes parcio fferm Cwrt ac yn cludo eich bagiau i'r cwch; mae gwaith deng munud o gerdded i'r bae o'r fferm. Efallai y bydd rhaid i chi aros ar y traeth am beth amser cyn i chi allu croesi. Gan nad oes unrhyw le i chi gysgodi ym Mhorth Meudwy, dylech sicrhau fod gennych ddillad glaw a rhywfaint o fwyd a diod.

Bydd y croesi’n cymryd tua 20 munud. Os yn bosibl, dylai ymwelwyr helpu i lwytho a dadlwytho’r cwch.


Côd post Satnav ar gyfer fferm Cwrt yw LL53 8DA - cliciwch yma i weld y map.

Manylion bws i Uwchmynydd - yma
Dyma dudalen flaen cludiant cyhoeddus Cyngor Gwynedd - yma

Mae Bws Arfordir Llŷn hefyd yn cynnig gwasanaeth.

Manylion Llety

Rydym yn cynnig llety hunan-arlwyo sylfaenol. Nid oes trydan yn y tai. Defnyddir lampau amrywiol i oleuo’r tŷ. Oherwydd rheoliadau iechyd a diogelwch, ni chaniateir defnyddio canhwyllau na "tea lights".


Er nad ydynt yn foethus, mae’r tai wedi eu dodrefnu'n gyfforddus. Yn y gegin mae popty nwy, oergell/rhewgell, ac offer arlwyo digonol ar gyfer y nifer o breswylwyr a ganiateir ym mhob eiddo.


Fe ddarperir llestri, hylif golchi llestri, papur toiled, gemau ac offer glanhau tŷ.

Mae tawelwch Enlli yn un o brif resymau mae pobl yn dod i aros yma. Gofynnwn felly i’n holl ymwelwyr barchu hyn a chadw mor ddistaw ag sy’n bosib, enwedig yn ystod oriau’r nos rhwng 10yh ac 8yb.

Ni chaniateir anifeiliaid anwes ar Ynys Enlli.

Dŵr
Mae gan bob tŷ gyflenwad o ddŵr oer o ffynnon. Dylech fod yn ymwybodol bod dŵr yn brin yma a rhaid ei ddefnyddio'n ofalus ac yn gynnil.

Gwres

Lleolir stôf aml-danwydd yn ystafell fyw rhan fwyaf o’r tai. Os ydych yn dymuno’i thanio bydd cyflenwad o danwydd wedi ei leoli yn y tŷ i chi. Os byddwch angen mwy, mae posib ei brynu gan y Wardeniaid. Gofynnir i chi beidio â llosgi broc môr oherwydd mae’r halen yn niweidio leinin y simnai.

 

Babanod

Mae cot a chadair uchel ar gael drwy drefniant ymlaen llaw heb unrhyw gost ychwanegol.

Toiled Compost

Nid oes ystafell ymolchi yn y tai. Lleolir toiled compostio y tu allan i bob tŷ, yn yr ardd ran amlaf. Nodwch mai eich cyfrifoldeb chi yw gwagio eich bwced toiled eich hunain. Mae safle gwaredu ar gyfer pob tŷ.

Glanhau ac Ysbwriel

Mae Ymddiriedolaeth Ynys Enlli yn gweithredu polisi hunanlanhau yn y tai, hynny yw, nid ydym yn codi tâl am lanhau, ond rydym yn gofyn i’n holl westeion adael y tŷ mewn cyflwr glân a thaclus yn barod ar gyfer y gwesteion nesaf.
Rydym hefyd yn gofyn i westeion fynd â’u holl sbwriel a’u heitemau i’w hailgylchu yn ôl gyda nhw. Gosodir biniau ailgylchu wrth y fynedfa i fferm Cwrt ar y tir mawr.

 

 

Canslo

Unwaith y byddwch wedi talu eich balans yn llawn nid ydym yn gallu ad-dalu eich arian os bydd rhaid canslo.
Os bydd rhaid i chi ganslo eich archeb am un o’r tai bydd Ymddiriedolaeth Ynys Enlli yn gwneud pob ymdrech i ail-osod y tŷ. Os byddwn yn llwyddo, yna byddwn yn fodlon ad-dalu eich taliad ond yn cymryd tâl bychan ohono am gostau gweinyddu. Fodd bynnag, os na allwn ail-osod y tŷ, ni fyddwn yn gallu rhoi ad-daliad i chi.


Cynghorir ymwelwyr i drefnu eu hyswiriant canslo eu hunain er mwyn diogelu rhag achos o salwch neu ddigwyddiad yswiriadwy arall.


Ni fydd Ymddiriedolaeth Ynys Enlli yn codi ffi ar ymwelwyr nad ydynt yn gallu dychwelyd i'r tir mawr o ganlyniad i oedi wrth geisio croesi neu dywydd gwael.

Yswiriant

Mae croesi i Enlli yn dibynnu i raddau helaeth ar y tywydd ac o bryd i'w gilydd mae angen gohirio teithiau. Pan fydd hyn yn digwydd ni fydd Ymddiriedolaeth Ynys Enlli yn gyfrifol am unrhyw ad-daliad nag iawndal. Fe'ch cynghorir i drefnu polisi yswiriant eich hun.


Os byddwch yn cael eich gorfodi i ganslo eich ymweliad ag Enlli am unrhyw reswm, yn cynnwys tywydd gwael, ni fydd Ymddiriedolaeth Ynys Enlli yn atebol am golled o dan unrhyw amgylchiadau.

 

Pethau hanfodol - Beth ddylech chi fynd gyda chi?

Dylech gludo cyn lleied â phosib o fagiau os gwelwch yn dda gan nad oes cymaint â hynny o le yn y cwch. Gofynnir i chi bacio pob dim mewn parseli bach sy’n hawdd eu trin a sicrhau eu bod yn dal dŵr (cynwysyddion neu lapio mewn plastig) ac wedi eu pacio’n dda. Dylech nodi enw’r tŷ lle byddwch yn aros yn glir ar bob darn o eiddo. Fe all bagiau heb eu nodi gael eu dal yn ôl neu fynd ar goll.

 

Gwnewch yn siŵr i ddod â'r canlynol ar gyfer eich wythnos:

  • Esgidiau a dillad ar gyfer pob tywydd

  • NEWYDD YN 2019 - mae cwilt ar gyfer bob gwely. Dewch a gorchudd y maint cywir ar gyfer bob cwilt

  • Cynfas a chas gobennydd (mae 2 obennydd i pob person)

  • Pyjamas cynnes, gan nad oes gwres yn yr ystafelloedd gwely

  • Llieiniau ac offer ymolchi

  • Llieiniau sychu llestri

  • Fflachlamp dda a batris sbâr - ni chaniateir defnyddio canhwyllau na "tea lights"

Pwysig

  • Meddyginiaeth - os ydych yn defnyddio unrhyw feddyginiaeth, dylech sicrhau eich bod yn dod â chyflenwad ychwanegol i barhau am o leiaf wythnos arall.

  • O ran bwyd a diod, dewch â mwy nag sydd ei angen arnoch ar gyfer eich arhosiad, oherwydd yn achlysurol fe all y tywydd rwystro’r cwch rhag croesi ar y diwrnod a drefnwyd. Nid oes siop fwyd ar yr ynys, dim ond beth sydd ar werth yn y fferm - gweler isod.

Offer ychwanegol
Yn naturiol, mae pen draw i faint o fagiau y gellir eu cludo ar y cwch. Fodd bynnag, fe all y canlynol ychwanegu at eich profiad ar Enlli:

  • Ysbienddrych

  • Deunyddiau celf

  • Gwialen bysgota / abwyd

  • Offerynnau cerddorol (heb fod yn rhy fawr - dim pianos os gwelwch yn dda!)

  • Camera a batris sbâr - ni chaniateir ffotograffiaeth fasnachol heb ganiatâd Ymddiriedolaeth Ynys Enlli.

  • Ffôn symudol - Dylech fod yn ymwybodol nad oes fawr o signal ffôn ar Enlli. Weithiau fe gewch signal ffôn symudol o Iwerddon ond mae’n ddrud. Cewch signal ffonau EE (y gorau) a Vodafone mewn rhai mannau ar yr ynys. Cofiwch nad oes trydan i ail-lenwi eich ffôn symudol ar yr ynys.

  • Gwifrwr batri solar ar gyfer ffôn symudol neu dablet.

Nid yw Ymddiriedolaeth Ynys Enlli yn cynghori pobl i hwylio, caiac neu nofio o gwmpas arfordir Enlli gan fod yr adlif yn gryf a peryglus. Mae unrhyw un o'r gweithgareddau hyn yn cael eu cynnal ar eich menter eich hun.

Nid yw Ymddiriedolaeth Ynys Enlli yn caniatáu hedfan drôn, ddarllenwch Bolisi Drôn Ymddiriedolaeth Ynys Enlli am fwy o fanylion. 

Fferm a ChaffiTŷ Pellaf, Enlli

Yn cychwyn yn 2019, bydd y caffi, sy'n cael ei redeg gan y teulu Roberts, yn parhau i gynnig diodydd, yn ogystal â hufen ia, byrbrydau a chacennau cartref amrywiol bob dydd.

Mae gan Dŷ Pellaf drwydded i werthu alcohol, sy’n lleihau'r angen i ddod â chyflenwadau gyda chi. Gweler y rhesr a phrisiau yma. Mae brecwast llawn, yn enwedig ar ddiwrnodau ymadael nawr ar gael, ar adeg sy'n gyfleus i chi. Mae’r caffi hefyd yn bwriadu cynnig prydau gyda'r nos neu tecawê ar nosweithiau penodol yn ogystal â noson caws a gwin unwaith yr wythnos! Cysylltwch am ragor o wybodaeth.

Mae hyn yn dipyn o newid wrth gwrs ac mae'r teulu yn gobeithio y bydd hyn yn gwella'ch profiad a'ch mwynhad o'r ynys. Os oes gennych unrhyw ofynion arbennig neu os ydych chi eisiau rhywbeth hollol wahanol, cysylltwch i drafod eich anghenion. Bydd gwasanaethau amrywiol yn cael eu hysbysebu ar yr ynys yn wythnosol.

 

Os oes angen mwy o fanylion arnoch neu wybodaeth benodol, cysylltwch â Thŷ Pellaf; bydd rhoi gwybod ymlaen llaw am eich gofynion yn helpu'r caffi i baratoi eich archeb.

Yn ogystal â'r caffi, bydd y fferm yn gwerthu wyau ffres, llysiau tymhorol, crancod a chimychiaid wedi'u berwi neu ffres yn syth oddi ar y cwch, eto cysylltwch ymlaen llaw i ofyn beth sydd ar gael ac i archebu.

I gysylltu â Chaffi Tŷ Pellaf, ffoniwch 07535 064943 neu e-bostiwch wgroberts@hotmail.co.uk